Titisan Kuda

Sambil kuciakan Undas awan kakawanannya mangincang ka warung Haji Ijuh. Buhannya kahimungan dapat minuman nang dibayariakan Pangirak Aban. “Kada karasaan lagi ngangalnya mambarasihi kulam langgar,” jar Undas nang diaminakan kakawanannya. Pangirak Aban himung mandangar pandiran Undas, sambil kakarinyum Pangirak bajalan ka higa warung mamaraki abahnya Isah awan Haji Ali nang lagi asik bacatur.

“Ada ah sudah nang kalah?” jar Pangirak Aban manakuni buhan nang bacatur sambil maangkat bangku mamarakakan ka mija caturan.

“Balum sapapan lagi Pangirak ai,” jar Haji Ali sambil mamindah talajuk di papan caturan.

“Salah itu Ji ai,” jar Pangirak managur Haji Ali, “mun talajuk nang dipindah … maka kuda urang tu kawa mahaluk raja pian … mun aku Ji ai … hakun manyurung bidak nang di muka mantri salajur mahalangi jalan bitir urang.”

“Nah … bujur lah …” jar Haji Ali sambil manjapai talajuk handak mambulikakan ka asalnya.

“Eit … eit … napa cacap igut nih,” ujar Abah Isah nang marasa cagar manang managur kalakuan Haji Ali, “mun bacatur kaya itu pacangan kada bakatuntungan kita main.”

Mandangar pamandiran Abah Isah nang pina karas tu, buhan kanakan nang lagi asik makan gaguduh panas … maningau ka bubuhan nang tuha lagi bacatur.

“Bah … dikiyau mama … dangani ka pasar jar.” Mandadak ada suara Rina, anaknya Haji Ali, manyuruh abahnya bulik.

Haji Ali kakarinyum … lalu badiri sambil baucap, “Maafai lah … aku handak maatar biniku ka pasar.” Haji Ali kahimungan marasa diselamatakan anaknya.

Malihat Abah Isah nang kada sing bunyian, Pangirak Aban kada nyaman hati, tapi kada hakun manggantiakan kadudukan Haji Ali. “Din …,” jar Pangirak Aban mangiyau Udin nang lagi badiri sambil maandak cangkir teh nang sudah habis isinya, “gantiakan Haji Ali Din ai.”

“Ayuha,” jar Udin sambil bajalan mamaraki mija caturan.

Malihat ada nang hakun mangganti … Haji Ali mahancap bulik diiringi anaknya. “Salamat … kada jadi kalah aku hari ini,” garunum Haji Ali.

“Bah … napa … nang kaya Udin ni … inting … cari kawan ikam Din ai mun handak bacatur awan aku,” ujar Abah Isah manantang.

Imuh nang paling talinga rinjingan di antara kakawanannya panas mandangar suara Abah Isah mahapak Udin, “uma lah Abah Isah ni … manantang banar lah … kalu kami garumuti.”

“Ha … kumpul buhan ikam sini Muh ai,” jar Abah Isah manantang.

“Na … lah … kada salah kami lah … ayu Ndas kita garumuti Abah Isah ni,” jar Imuh sambil baparak ka mija caturan. Undas mambuntil di balakang Imuh. Laluwai Undas awan Imuh badiri di higa Udin nang sudah duduk mambakasi kadudukan Haji Ali. Saking sariusnya, Undas awan Imuh bahanu cagat badiri … bahanu batungging maitihi pusisi anak caturan.

“Biarakan haja kuda tu dimakan urang Din ai … tuh … surung bidak nang di muka raja tu dua langkah,” jar Imuh mamadahi Udin. Udin langsung haja manyurung bidak sasuai kahandak Imuh.

Brakkk … tadangar suara papan catur karna Abah Isah mahangkupakan bidaknya mamakan kuda Udin.

Sambil bagamat Imuh maangkat talajuk … lalu dikuirakannya ka bitir Abah Isah, sampai bitir tu gugur ka tanah.

Abah Isah takajut malihat bitirnya dimakan talajuk Udin gara-gara bidaknya nang mamakan kuda Udin. Handak ba asa … takutan ditatawa akan kakanakan … supan pulang awan Pangirak nang galagak-galagak mananawa akan kalakuan kakanakan. Lawas Abah Isah mamikirakan sambil kukurikis ibujarinya ka kapala kuda sambil diandak di bawah ruku nang ada di bibirnya.

Undas nang malihat kalakuan Abah Isah bapandir, “tu kuda Abah Isah ai … lain titisan.”

“Nah am … tatitis kuda sakalinya lah,” jar Pangirak bapandir sing nyaringan.

Buhan panyumbalihan hayam nang lagi asik bapandiran sambil minum tatawaan mandangar pandiran Pangirak. Buhan kakawanan Undas kuciakan. Abah Isah habang muha Manahan sarik.