Hidung Parak Pipi

Di sakulahan wadah bini Undas bagawi wayahini ada kasampatan khusus gasan bagayaan awan kakawanan. Tahun-tahun dahulu waktu gasan bagayaan nang anggaran takumpulan samua’an tu palingan dua kali limablas menit. Wayahini gasan bagayaan bapanjang … yaaahhh … labih sadikit pada sajam lah. Buhannya hanyar bulik jam satangah tiga, padahal buhan murid sudah bulikan parak satangah dua. Gawian buhan guru nang sajam tu biasanya manulis “buku aktivitas.” Manulis buku aktivitas harian tu palingan saparapat jam … mun dilawasakan … anggap haja satangah jam.

Tabarungan diwadah bini Undas bagawi tu ada jua bini mamarinanya nang biasa dikiyaunya Acil. Di sakulahan tu si Acil ni tamasuk nang karaing. Mun di sakulahan tu dilihat Acil ada nang pina kada cucuk awan aturan langsung ditagurnya. Maka kada bapilih mun managur urang, jar kakanakan wayahini … Acil tu tamasuk nang lampunya kurup atawa kada balampu. Nang pina wani mahuhulut tarang-tarangan awan Acil tu bini Undas haja, maklum bini Undas ni kakana’annya kada balampu jua.

Hari itu, imbah buhan murid bulikan, gawian bubuhan guru kada banyak. Imbah tuntung manulisi buku aktivitas, bini Undas baulah pungkala. “Cil … Cil … Cil …” jar bini Undas mangiyau si Acil nang lagi balinjang di muhara lawang ruang guru.

“Napang,” jar Acil sambil bajalan mamaraki bini Undas.

Bini Undas sambil bagamat basuara : “Ijul Cil ai samalam mamandiri kanakan kalas sambilan … hidungnya parak pipi.”

“Hah!” jar Acil takajut, “mancium kakanakan ngarannya tu,” sambil manciling-ciling mancangangi bini Undas.

“ Jul … Jul …,” jar bini Undas sambil mangawai supaya Ijul baparak.

Imbah Ijul datang baparak, bini Undas langsung baucap awan Acil. “Ni Cil Ijulnya … nang jar ulun samalam mamandiri kanakan kalas sambilan.”

“Napa Jul,” jar Acil, “ikam bujur mancium kakanakan ah!” makin tinggi suara Acil.

“Ai … kadada Bu ai,” jar Ijul nang takajut-kajut sambil mangaluarakan inguh Barabai.

“Nah … tasalah ham Acil ni,” jar bini Undas, “nang ngaran mancium tu bila hidung mahayut pipi Cil ai.”

“Biar kada tacium ai ….” jar Acil masih mangancang.

“Naaahhh … kaya ini nah Cil … ulun batakun lah,” jar biniku, “hidung pian awan pipi pian tu parakah … jauh kah?”

Imbah ditakuni nang kaya itu, hanyar sadar Acil, “dasar … bini Undas nih … halabiu buruk,” jar Acil sambil bajalan mandatangi kadudukannya. Buhan guru nang mandangar tu tadarau galagakan Manawa akan Acil nang kada sing bunyian lagi.