Jangan Dibariakan

Undas awan kakawanannya bajalanan ka Malang. Kakawanan Undas tu gawiannya kada sama. Ada nang jadi Hakim Pengadilan Tinggi Agama (PTA), ada nang jadi dosen di IAIN, ada nang jadi anggota DPRD, ada jadi pejabat musiman. Di Malang, Undas awan kakawanannya bamalam di rumah kawan nang tabarungan baisian rumah. Bajijir Undas awan kakawanannya guring di ruang tamu.

“Biar gawian kada sama, tapi guringnya tatap sama,” jar dosen basuara hangkui salajur manggarak kakawanan.

“Mangaruhnya ah nang sama Pa Dosen,” sahut si pejabat musiman sambil manguliat.

“Sadang sudah guringnya … tu nah … masigit sudah bakiauan,” jar dosen.

Darusutan Undas awan kakawanannya ka dapur manuju kamar mandi. Imbah samuaan tuntung mandi, buhannya sambahyang subuh baimaman. Nang jadi imam Hakim Pengadilan Tinggi Agama. Tuntung sambahyangan kakawanan Undas ada nang mamadar, tapi Hakim imbah mamacul baju … inya baduduk sambil basandar ka dinding pahalat kamar tamu awan kamar guring anak ampun rumah.

“Kim,” jar Undas sambil baisut mamaraki hakim PTA.

“Napa Ndas,” jar si Hakim sambil takarinyum mancangangi Undas.

“Pian di Banjarmasin bagana dimana?” jar Undas manakuni Hakim.

“Kabun Bunga Ndas ai,” jar Hakim manyahuti.

“Gawian pian pang dimana,” jar Undas batakun pina sarius.

“Aku bagawi di Palangkaraya,” jar Hakim.

“Napa jadi bapisah awan bini,” jar Undas.

“Biniku Ndas ai jadi guru di SD Kabun Bunga … aku tiap kamarian Jumahat… mun kadada gawian bulik ka Banjarmasin … kamarian Ahad tulak ka Palangkaraya,” jar Hakim manjalasakan gasan inya kada bapisah awan bininya.

“Anak pian pang dimana?” jar Undas batakun.

“Awan umanya Ndas ai,” sahut Hakim mulai curiga arah tatakunan Undas. “Anakku saikung haja … binian Ndas ai … masih SD,” sambung Hakim manjalasakan.

“Nah … lah … ulun bapasan haja pang lah …” Undas manyatup pamandiran sambil malihati muha Hakim nang pina bingung mandangar pandiran Undas, “kaya ini Kim ai … kaina mun anak atawa bini pian bapadah handak ka mall … jangan dibariakan,” sambung Undas.

“Kaya apa mun buhannya tulakan ka mall aku wayah di Palangkaraya … kada kawa manjagai nang kaya itu aku Ndas ai,” jar Hakim nang marasa kada katuju awan pasannya Undas.

“Nah … jar ulun tadi tu munnya bapadah, nang jar pian tu ngarannya kada bapadah,” jar Undas mahual Hakim.

“Ada apa garang di mall … jadi aku kada bulih mambariakan anak atawa biniku ka mall?” jar Hakim sambil ma anyaki pandiran Undas.

“Mun anak atawa bini pian dibariakan ka mall …” jar Undas sambil manyatup satumat pandirannya, “pian pacangan kada baisi anak awan bini lagi Kim ai,” jar Undas sambil manampaiakan muha pina sarius.

Hakim masih bingung, bakakajutan tadangar dosen tatawa galagak-galagak sing hangkuian sambil bangun pada parabahannya. “Ikam digawi Undas Kim ai … dihutanginya Kim ai,” jar dosen nang sambil tatawa kikil malihat muha Hakim nang mulai takarinyum.