Artis Kremi

Hari raya kedua Undas baduaan haja awan anaknya nang masih SMA bulik ka Banjarmasin. Jam satangah tujuh baisukan tulak mulai Kandangan, sampai di Banjarmasin pas jam sapuluh. Istirahat satumat di rumah, kira-kira jam sabelasan tulakan awan anak basapida mutur mandatangi rumah Bos nang lagi open house, yaaahhh … itung-itung salajur makan siang, maklum bini masih bahari raya awan adding-adingnya di banua.

Nang ngaran sudah kanyang, Undas awan anaknya langsung bulikan ka rumah,kadada kapikiran basinggah lagi. Pas di muka rumah sakit bayangkara, Undas maningau ka higa, lalu manakuni anaknya, “Sel, tu gambar siapa.”

“Gambar nang mana Bah?” jar anak Undas.

“Tuh,” jar Undas sambil mamunyungakan muntungnya ka papan iklan (billboard) nang malintang di jalan parak jalan layang.

“Artis internasional Bah ai,” sahut anak Undas, “napa garang Bah,” sambungnya.

“Ngarannya siapa?” jar Undas maanyaki tatakunannya.

“Kada ingat Bah ai,” jar anak Undas.

“Kira-kira di iklan tu nang kada nyaman dilihat apa yu,” jar Undas.

“Sapida muturnya kah Bah,” jar anak Undas.

“Kada,” jar Undas.

“Kata-katanya tu kah Bah,” jar anak Undas nang pina bingung awan tatakunan abahnya.

“Kada jua,” jar Undas.

“Nangapa nang kada nyaman dilihat tu Bah,” jar anak Undas banyaring suara karena makin bingung awan tatakunan abahnya.

“Gambar urangnya tu nah,” jar Undas mulai maarahakan ka jawaban nang dikahandakinya.

“Asa kadada nang kada nyaman di gambar urang tu Bah ai,” sahut anak Undas.

“Hahahaha gambar tu kaya urang garing,” jar Undas.

“Hah … garing napa Bah,” jar anak Undas pina takajut.

“Kaya urang kana kremi,” jar Undas.

“Napa itu kremi?” jar anak Undas batakun.

“Hahahaha … kremi itu penyakit cacingan, cuma cacingnya halus-halus. Urang nang kana panyakit kremi biasanya rancak manggaru burit,” jar Undas manjalasakan.

“Apa hubungannya awan gambar iklan tadi,” jar anak Undas bahimat manakuni abahnya.

“Iklan itu menggambarkan urang nang lagi kana kremi, sualnya tangannya sabalah kaya lagi manggaru burit,” jar Undas manjalasakan keanehan urang nang lagi kana kremi masih kawa bajual sapida murut.

“Pian ni Bah lah,” jar anak Undas pina sangkal mandangar kesimpulan abahnya.