Bahambatan di Kalaras

Undas tu urangnya katuju balulucu, jadi banyak baisi kawan. Kawannya Undas macam-macam jua kalakuannya. Mun di kampung kakawanannya banyak nang nakal, ada nang katuju bagadang, ada nang katuju pamainan, ada jua nang katuju bamiminuman. Mun di sakulahan, kakawanan Undas kada nang nakal haja, buhan nang pintar awan nang baduit katuju jua mangawani. Napang gawian Undas tu barangkap, kada balulucu haja gawiannya, tapi jadi tukang pos, itu tuuuhhhh … tukang atar surat lakian nang manaksir binian langkar.

Mun Undas sakulah, kuitannya kada banyak manyangui duit, maklum … gawian kuitan Undas tu bawarung banyu teh di higa sakulahan SD. Jadi mun ada kawannya nang minta atarakan surat, si Undas himung banar. Napang mun imbah maatarakan surat … Undas ditraktir makan ulih kawannya wayah istirahat di sakulahan.

Kakawanan Undas banyak banar nang sudah baisi gandak. Banyak jua kakawanannya nang bagandakan tu karna sudah ditulunginya. Gandak kakawanannya itu jadi kawannya Undas jua. Nah … wayah takumpulan awan kakawanan … rami bakisahan. Wayah Undas handak manyurung kisah, langsung Atun managur: “Ndas … ikam kada usah umpat bakisah … ikam tukang dangarakan haja.”

Utar, pacarnya Atun, rupanya asa kada nyaman mandangar suara Atun, laluwai batakun: “Napa jadi Undas kada bulih bakisah Tun ?”

“Anu Yang ai … Undas tu balum cukup umur,” jar Atun manyahut sambil kakarinyum.

Sunging talinga Undas dipadahakan balum cukup umur, “rasanya kita ni sapantaran haja umur,” protesnya.

“Ikam ni Ndas ai kada baisi gandak lagi … makanya kupadahakan kada cukup umur,” jar Atun manjalasakan, “lihati kami nih … bagandak samuaan kalu?”

Kakawanan Undas imbah mandangar pamandiran Atun langsung badarau tatawaan. Undas taungut mamikirakan diri nang kada sing payuan. Dalam hati Undas, “aku ni kada kalah jua awan kakawanan … bapandir rasanya bisa haja, napang buhannya nih katuju ha bakawan awan aku.”

Wayah kakawanan masih tatawaan, si Undas masih baungutan sambil kakarinyum masam, lalu Wati, binian sakampung awan Undas tapi di sakulahan lain kalasnya. Wati tu manurut Undas tamasuk babaya langkar awan balum baisi gandak. Aku cubai nang ini pang, jar Undas dalam hati.

“Wati … Wati … ka sini pang,” jar Undas sambil mangawai Wati.

“Napa Ndas,” jar Wati manyahuti sambil mamaraki Undas.

Kakawanan Undas nang tadi rami mananawa akan sindam barataan malihat Wati mandatangi Undas. Karna Wati tu di sakulahan ditakutani urang, sualnya panyarikan banar, lakas tasinggung.

“Padahi mama ikam lah,” jar Undas mamandiri Wati, “aku kirim salam awan anaknya, bulihai kalu?” sambung Undas bapasan awan Wati.

“Ikam ni Ndas lah … pina paiyanya … urang ti ditiring muha ikam tu,” sahut Wati sambil bamamai.

Undas kada handak supan, laluwai manyahuti, “Sapuluh kaya ikam ni Wati ai … sambil bahambatan di kalaras gin kulihan ….” Sambil babisik ka arah Udin nang pas badiri di higanya, “kalalawar,” jar Undas.

Undas imbah baucap nang kaya itu langsung mangalunyur bajauh diiringin kakawanannya.

Wati marasa panas disuarai Undas nang kaya itu bakuciak mangiyau, tapi Undas kada hiran-hiran makin bahancap maninggalakan Wati.