Badapur Dua

Jam 11-an ada kesempatan manjinguk sakulahan, itu gin disasampatakan. Sualnya ada gawian sakulahan nang onlain pina ngalih ditarusakan, “imbah sampai di situ Pa ai tacandak tarus” jar operator sakulahan. Bacucubaanai nang tuha mamicik kasana kamari, sakalinya sama haja kada kawa manarusakan. Supaya buhan sakulahan kada sangkal, laluwai kami ni manggawi gawian tu sambil manelpon ahlinya, Alhamdulillah jadi lancar. Satangah satuan gawian kawa ditarusakan operator.

“Kita makananai Pa ai,” jar Ulis (ini guru lakian lah) sambil maarahakan ka ruang kapala sakulah.

Nang ngaran pas lalaparannya, tapaksa ai hakun mairingi Pa Ulis.

“Salawas wayahini Pa ai, banyak guru nang baisi dapur dua,” jar Pa Ulis.

“Maksudnya?” jarku sambil mancangangi Pa Ulis.

“Napang mun kami disuruh bulikan sampai jam satangah tiga, jadi kami baulah dapur pulang Pa ai,” jar Pa Ulis manyahuti.

Dipikiranku ni mancungul sangka nang kada bagus, karna istilah baisi dapur dua bisa diartiakan babini dua. “Bulih kah PNS tu babini dua?” jarku batakun awan Pa Ulis.

“Bulih Pa ai, asal jangan katahuan haja,” jar Pa Ulis pina tamam ha muhanya mancangangi aku.

“Jadi di sini banyak kah guru nang babini dua,” jarku sambil kakarinyum.

“Kada Pa ai,” jar Pa Ulis.

“Nah … itu tadi pang, napa bapandir kaya itu?” jarku banahap batakun.

“Oh … itu kah,” jar Pa Ulis sambil gagalagak mananawa akan, “kami di sini Pa ai bamasakan tiap hari Sanayan sampai Kamis, makanya kami baisi dapur dua butingan, di rumah sabuting … di sakulahan sabuting,” jar Pa Ulis makin lucut mananawa akan aku.

Imbah sudah dipacahakan Pa Ulis tu, umpatai jua aku tatawa, tapi muhaku pina birut pang.