TAUNGUT

Umailah ... hari ini hujan baharianan, pinanya saalaman. Bahanu labat hujannya, bahanu pina handak taduh ... kada sampat lawas balabat pulang. Padahal di rumah Undas sudah dua hari babuka puasa kada mamakan kurma.

Bini Undas pusang malihat hujan nang kada sing taduhan. Kira-kira hari sudah jam sapuluhan, hujan mulai taduh. Bini Undas nang asalnya balinjang kaluar masuk kamar, langsung maambil telpon. Undas malihat kalakuan bininya langsung batakun, “siapang nang ditelpon?”

“Ana,” jar bini Undas manyahut sambil tangannya maangkat telpon ka talinganya.

Ranai Undas mandangar sahutan nang bini, sualnya Ana itu ading bininya Undas nang tahu wadah batutukar barang murah.

“Jadikah kita mancari kurma hari ini?” tadangar suara bini Undas bapandir. Imbah tu ranai satumat, lalu tadangar pulang suara bini Undas, “masih labatkah ... diwadah kami tarang nah.”

Kada lawas bini Undas kaluar pada kamar, lalu duduk manatai Undas malihat tivi.

“Sama ai kalu leh, di sini biar tarang tatap ai jua labat hujannya,” jar Undas sambil matanya malihati tivi.

Tatawa bini Undas mandangar pandiran nang laki.

“Ana ka sinikah,” jar Undas batakun awan bininya.

“Kaina ... imbah Dzuhur,” jar bini Undas.

Undas kada manarusakan pandiran awan bininya, tapi mangiyau anaknya nang bamainan komputer di kamarnya.

“Napa bah,” jar Seila, anak Undas.

“Telpon kaka ikam nang di Surabaya,” jar Undas manyuruh anaknya.

“Babuang duit haja,” jar bini Undas manyahut.

Mandangar pandiran umanya, anak Undas nang sudah mamingkuti hape kada wani manelpon kakanya, tapi matanya cangang ka muha abahnya.

“Hari ini tanggal barapa,” jar Undas basuara.

“Hah ... hari ini ulang tahun kaka,” jar anak Undas nang langsung mangarti maksud takunan abahnya.

Anak Undas langsung manelpon kakanya, imbah tasambung langsung maucapakan selamat ulang tahun. Bini Undas nang disurungi hape ulih anaknya langsung banyanyi selamat ulang tahun. Imbah baucap tiga kata itu, bini Undas lucut tatawaan awan anaknya.

“Bah ... hadiah ulang tahunnya apa bah?” jar anak Undas nang di Surabaya basuara ditelpon.

“Ha ... ha ... ha ...”, jar Undas manyahut sambil tatawa lalu disambungnya, “aku kaina hadiahnya kirimi belinju haja gin lah.” Anak awan bini Undas mandangar pandiran Undas umpat jua tatawa.

Asa uyuh sudah Undas mahuhulut anaknya nang di Surabaya, lalu masuk ka kamar terus barabah. Kada karasaan sakalinya Undas taguring sampai tadangar suara bang mamadahakan sudah sampai sambahyang Dzuhur. Hujan di luar masih labat, sampai kira-kira parak jam dua siang datang ading bini Undas basapida mutur sambil mamakai jas hujan. Bini Undas malihat adingnya datang langsung maambil jas hujan jua, lalu tulakan nang badua baading mancari kurma.

Bini Undas bulik ka rumah labih sadikit pada jam tiga kamarian. Kurma nang ditukar bakutak isinya lima kilo. Tutukaran bini Undas kada hanya kurma, ada jua manukar iwak masak, gangan, awan urap. Wayah maungkai urap handak maandak ka mija makan bini Undas baucap, “kasian bibi nang bajual urap nih.”

“Nangapa jadi kasian,” jar Undas manyahut.

“Ulun lihat nang badagang urap pina baungutan, jadi kami singgahi, ulun tukari ai urapnya,” jar bini Undas.

“He ... he ... he ... kada marga kasian kalu leh,” jar Undas mudil curiga awan alasan bininya.

“Bujuran nah ... nang bajual urap tuh mambari kasian, sidin tadi pina taungut, makanya kami singgahi, lalu kami tukari urapnya,” jar bini Undas.

“Nang bajualan selain urap, ada lah urang lain bajualan parak sidin,” jar Undas.

“Kadada,” sahut bini Undas mantap.

“Sebelum buhan ikam manukar urap, adakah urang lain nang batutukar di situ?” jar Undas batakun lagi.

“Kadada jua,” sahut bini Undas lagi.

“Baarti nang bajual urap tu pina taungut gara-gara kadada kawan bapandir. Buhan ikam manukar urap kada karna kasian, tapi karna handak makan urap banarai,” jar Undas sambil tatawa malihat muha bininya pina wirai.