Kaya Metik

Baisukan Ahad, tanggal 24 Agustus 2014, saertean, mulai kakanakan sampai nang tuha, bakumpulan di lapangan lingkungan erte. Samuaan bapakaian olahraga, sualnya buhan kakanakan nang jadi panitia tujuh belasan maada akan acara jalan santai kaluarga gasan warga jiran erte. Untungnya wayah itu tuan guru nang kana gilir babacaan di masigit paham, jadi sidin ampih babacaan sakitar jam anam saparapat.

Sakitar jam tujuh panitia mangibasakan bandira tanda acara jalan santai dimulai. Undas awan bininya, awan anak-anaknya bajalan bajijir kira-kira di barisan kasapuluh. Rami ai baricau sambil bahuhulutan awan kaluarga jiran. Wayah acara-acara nang kaya itu pang kawa bahuhulutan awan papadaan sajiranan. Mun hari nang lain jarang kawa bakumpulan, ada jua pang wayahnya, tapi bapalih, nang kaya lakian atawa binian haja bakumpulan diacara yasinan.

Lagi rami-raminya bagayaan sambil bajalan, buhan kanakan dijijiran balakang kuciakan. “Kai … jauh lagi kai ai, kalu pina manggah, kadada nang mauruti pian,” bunyi suara kuciak. Undas maningau ka balakang, dilihatnya Tabri mangincang bajalan saurangan sing lajuan. Tabri tu ulih kakanakan biasa dikiyau kai, awan sidin katuju banar bagayaan awan kakanakan. Sambil kukurihing Tabri bajalan kada maningau kiwa kanan lagi. Kuciakan kakanakan ampih imbah Tabri kada kalihatan lagi ulih jurutan warga nang umpat jalan santai.

Undas imbah sampai ka finis, langsung bajalan mamaraki Tabri nang lagi kimul-kimul asik mamakan wadai nang disadia akan panitia. Tabri duduk bajuntai di panggung, jadi kalihatan banar mulai jauh.

“Uma … pian ni Tab lah, kada sing paluhan,” jar Undas mamandiri Tabri.

“Tapaluh ai jua Ndas ai,” jar Tabri manyahuti.

“Pian sudah tuha nang kaya ini masih kawa bajalan mangalahakan nang anum, napa garang amalan pian,” jar Undas mauyuni handak minta padahi amalan Tabri.

“Kadada amalan aku,” jar Tabri marasa himung diambung Undas, “bila sampai wayah sambahyang, aku sambahyang,” sambung Tabri manjalasakan.

“Mun olahraga pang, napa nang biasa pian gawi,” jar Undas sambil maanyaki.

“Mun nang itu, biasanya imbah sambahyang subuh aku bajalan bakuliling di jalan nang kita lalui tu pang,” jar Tabri.

“Bah, cucuk ai mun kaya itu …,” tasatup Undas bapandir, imbah mandangar suara Misran nang sudah badiri di balakangnya.

“Cucuk nangapa Ndas,” jar Misran manakuni Undas.

“Ulun manakuni sidin,” jar Undas sambil manunjuk Tabri, lalu disambungnya pandiran bamaksud maambung, “nangapa amalan sidin jadi pina kuat banar bajalan, jaka sapida mutur tu kaya nang hanyar kaluar di pabrik.”

“Kaya sapida mutur metik nang hanyar kaluar tu Ndas leh,” jar Misran.

“Hi ih, lakian awan binian katuju manunggang sapida mutur metik tuh,” jar Undas sambil manyirit muha Tabri nang pina kahimungan.

“Sapida mutur metik tu Ndas ai kada bagigi, kaya sidin ni pang,” jar Misran sambil kukurihing.

“Bah, pian ni Mis lah, awan nang tuha kaya itu bapandir,” jar Undas managur Misran sambil manggalagak tatawa.