Dimamai Sarumahan

Baisukan itu rami bakisahan Undas awan bininya. Nang anak mandangar kuitan pina rami bakisahan, umpat jua duduk di higa mamanya.

“Tu na Bah,” jar anak Undas sambil manunjuk wadai nang ada di atas mija, “wadai tu sabujurnya gasan mambari i Asan,” sambung anak Undas sambil manyambat ngaran sapupunya.

“Ada ai kalu urang bajualan di sini,” jar Undas.

“Mamanya Asan samalam handak manukarakan wadai tu di mol, tapi panjang banar jujurutan urang nang handak manukar di situ, lalu ai kada jadi manukar,” jar bini Undas.

“Oooh … kaya itu ah kisahnya,” jar Undas.

“Makanya am ulun ma sms pian Bah ai, sualnya imbah mandangar kisah adingnya,” jar anak Undas sambil manunjuk mamanya, “mama bajanji handak manukarakan Asan wadai tu,” jar anak Undas manyambung kisah mamanya.

“Parak urang bajual wadai tu ada jua jujurutan urang nang handak manukar wadai nang lain,” jar bini Undas bakisah.

“Oooh … itu warung wadai nang hanyar buka Ma ai,” jar anak Undas mamadahi mamanya.

“Kaya apa rasa wadainya tu lah,” jar bini Undas sambil mangijipi mata anaknya.

Undas sakilaran malihat bininya bakijipan mata awan anaknya, paham ai Undas awan kahandak bininya nang sacara kada langsung batagihan minta ditukarakan wadai hanyar. Undas jua kada kurang-kurang akal, lalu ai dialihakannya pamandiran.

“Nang ngaran warung hanyar … kaya itu ai,” jar Undas maalih pandir.

“Inggih Bah lih … sabubulan dua kaina sunyi ai warung tu,” jar anak Undas langsung manyambar pandiran abahnya.

Bini Undas langsung masam muha malihat anaknya nang balum mangarti maksud abahnya maalih pandir.

“Ya am tu Nak ai, urang Banjar tu katuju banar marasai nang hanyar-hanyar, imbah sudah tarasai … ampih ai inya,” jar Undas mandukung pandiran anaknya.

Anak Undas marasa pandirannya sama awan pikiran abahnya, lalu ai baungah awan abahnya, “kita manukar wadai tu imbah kada tapi ada nang batutukar di situ Bah lih,” sambil kilar-kilar matanya marasa kawa mamaksa abahnya bajanji manukarakan wadai hanyar tu.

“Makanya am nak ai,” jar Undas, “sama haja tu awan bini hanyar ….”

“Napa tadi,” jar bini Undas sing hangkuian bapandir sambil badiri awan bakacak pinggang, Undas takajut-kajut malihat kalakuan bininya.

“Sambat lagi pang,” jar bini Undas sambil manciling-ciling mancangangi Undas,

Undas galagak-galagak tatawa malihat bininya nang tapancing awan pandirannya.

“Bujur Ma ai,” jar anak Undas malawanakan umanya, lalu ai mamamai abahnya, “dasar abah nih … katuju banar mancari hual.”

“Mamai Ma ai abah tuh,” jar anak Undas nang saikungnya, nang asalnya kada sing pandiran, sambil tatawa-tatawa malihat umanya tapancing pandiran abahnya nang handak bagayaan.