Mantes Madu

Kira-kira bulan Mei 2011 di Banjarbaru, wayah itu bubuhan perwakilan pengawas sekolah se-Kalimantan Selatan bakumpulan di LPMP (Lembaga Penjaminan Mutu Pendidikan). Pas takana giliran Undas bapandir di hadapan kakawanannya, kaluaran kisah nang maulah manginging talinga buhan pengawas Tabalong. Tapi mangingingnya satumat haja pang, imbah tuntung kisah kadada nang mahual lagi pang.

“Ingatlah buhan pian wayah kita bakumpulan di Tanjung bulan Oktober 2010 dahulu?” jar Undas mamulai pamandirannya.

Kakawanan pengawas nang takumpulan di ruangan itu unggut-unggut maakuri tatakunannya Undas. Mun buhan pengawas Tabalong barataan cagat duduk di bangkunya masing-masing, sualnya buhannya pang nang jadi ahlul bait wayah itu.

“Wayah kita di Tanjung samalam tu bulikannya tiap ikungan dapat sangu kalu leh?” jar Undas pulang mudil batakun.

“Hi ih,” jar buhannya badarau. Buhan Tabalong kada sing bunyian … marintim ha pulang muha.

“Nah … tapi maaf haja pang lah … madu nang kita bawa tu sakalinya kadada nang aslinya,” jar Undas.

“Ndas,” jar Udin, pengawas nang bagawi di Kandangan, managur Undas, “baapik-apik bapandir lah … jangan mancari hual,” sambung Udin.

Mahatiakan banar Udin, kalu pina kakawanannya bahualan. Sualnya Udin awan Undas tu mulai kuliah bakawan banar, sama-sama urang Kandangan, nang kada sama tu Udin bagawi di Kandangan … Undas bagawi di Banjarmasin. Mun bahualan, Udin kada kawa malawanakan Undas, sualnya nang mancari gara-gara Undas.

“Ulun kada mancari hual Din ai … dasar bujur kada asli madunya tu,” jar Undas manyahuti.

“Madu tu aku Ndas ai nang mancarinya … ka rumah urang nang mamuai wanyinya,” bakakajutan Adul, pengawas nang bagawi di Tabalong, mamadahakan asal muasal manyadia akan madu.

“Nang kamana kah pian mancari madu tu Dul ai, nang nyata kami mambawa nang kada asli,” jar Undas bakaras manyahuti pandiran Adul.

“Sudah pian tes lah Ndas madunya,” jar Ijul, pengawas nang bagawi di Tabalong.

“Sudah … makanya ulun tahu madunya kada asli,” jar Undas.

“Mantesnya awan korekapi kah Ndas,” jar Jali, pengawas nang bagawi di Barabai.

“Kada,” jar Undas manyahuti.

“Masukakan ka preser di kulkas … sampai saminggu gin kada baku madunya Ndas ai,” jar Ipin, pengawas nang bagawi di Amuntai.

“Ah …,” jar Undas mampahawai usulan Ipin, “nang kaya itu tu kada manjamin kaaslian madu Pin ai.”

“Kaya apa garang mantesnya sampai pian pina musti mamadahakan madu tu kada asli,” jar Adul nang makin sangkal mandangar pandiran Undas.

“Kisahnya kaya ini nah,” jar Undas mulai manjalasakan, “imbah sampai di rumah, madu tu ulun andak di mija, bini ulun tatawa imbah malihat ulun mambawa madu ….”

“Mambuktiakan asli kadanya madu tu kaya apa Ndas,” jar Adul magin kancang bapandir, habang ha pulang muhanya.

“Itu tadi … jakanya madu itu asli … kada pacangan tatawa biniku … dirungkupnya Dul ai,” jar Undas manjalasakan cara mantes kaaslian madu.