POTONGAN

Wayah ada pemilihan umum biasanya timbulan akal-akalan urang gasan manarik parhatian warga. Akalnya urang nang handak tapilih sudah pasti banyak awan kada aneh. Nang rami tu amun ada akalan bubuhan KPPS nang handak manarik parhatian buhan pamilih supaya datang ka TPS mangguna akan haknya. Akalan buhan KPPS itu ada nang maharusakan anggutanya bapakaian bibinian, ada nang mambari i makanan gratis gasan pamilih nang datang, ada nang mamutar video banyanyi, pukunya macam-macam pang.

Di TPS wadah Undas mancucuk ada habar, siapa haja pamilih nang datang mangguna akan hak pilihnya dapat diskon baulanja di warung Haji Ijuh. Diskonnya kada alang-alang, samua an barang nang ada di warung Haji Ijuh dapat diskon sampai 25 %. Syaratnya bila baulanja di warung Haji Ijuh harus manampaiakan jariji nang bakas kana tintah di TPS.

“Pian kamarian kaina bila baulanja di warung Haji Ijuh didiskon sampai 25%,” jar Undas mamadahi Ali nang hanyar manjulung undangan pamilih ka panitia.

“Jangan bagaya Ndas ai,” jar Ali satangah kada parcaya.

“Bujuran nah Li ai … tapi kada samua an urang nang baulanja di warung Haji Ijuh tu didiskon sidin sampai 25%,” pina tamam muha Undas mayakinakan Ali.

“Mbah … kaya apa supaya kawa didiskon 25%?” jar Ali mulai tatarik awan pandiran Undas.

“Ikam kaina Li ai … bila ka warung Haji Ijuh … tampaiakan jariji nang bakas tintah tu … lalu babisa-bisa mamandiri sidin,” jar Undas mamadahakan syarat dapat diskon.

Kamarian, sudah parak awan sambahyang magrib, Ali bajalanan ka warung Haji Ijuh. Dilihatnya pina banyak buhan binian di palataran rumah Haji Ijuh. Palataran rumah tu basambung awan warung. Ali bajinguk ka dalam warung, kadada kalihatan Haji Ijuh, nang ada tu bininya Haji Ijuh lagi bakisahan awan kakawanannya.

“Handak manukar napang Li,” jar bini Haji Ijuh imbah malihat Ali bapaling handak bajauh pada warung.

“Mancari gula sakar,” jar Ali.

“Ada ai tuh … handak barapa kilo garang manukar gula sakar?” jar bini Haji Ijuh batakun.

“Sakilo haja pang,” jar Ali. Ali handak mantis pandiran Undas di TPS baisukan tadi nang mamadahakan ada diskon, tapi nang manunggui warung bini Haji Ijuh, lain Haji Ijuhnya. Sambil baparak awan bini Haji Ijuh, Ali batakun, “bujuran an di sini ada diskon?”

“Bujurai … sapuluh parsin,” jar bini Haji Ijuh.

“Undas tadi bahabar diskonnya sampai 25%?” jar Ali bawani batakun.

“Kawa haja mun pian handak minta diskon 25% … sakilo haja kalu manukar gula sakar?” jar bini Haji Ijuh.

Ali manjulung duit haraga dua puluh ribuan ka bini Haji Ijuh. Imbah maambil angsulan awan gula nang sudah babungkus, bini Haji Ijuh manjulung awan Ali. Ali bingung imbah maitung angsulan nang jumlahnya ampat ribu, lalu batakun ai inya awan bini Haji Ijuh, “napa jadi angsulannya ampat ribu haja?”

“Ikam tadi handak minta diskon kalu,” jar bini Haji Ijuh, imbah malihat Ali baunggut, bini Haji Ijuh manarusakan pandirnya, “haraga gula sakar sakilonya anam balas ribu … gulanya kudiskon 25% … jadi sisa gula sakarnya tiga parapet kilo … bujur ai kalu?” jar bini Haji Ijuh.