Kadada T nya

Bilang kada sing sunyian warung H. Ijuh awan bubuhannya, karana di warung nangini wadainya panas-panas, wan pas banar jua hagan batukar habar nangapa haja. Parak batangaharian sudah Ujal kada sing ugahan wan kadudukan, napang tunggal ikungan manyurung kisah basambung-sambung. Parahatan Aran manyurung kisah, Ujal papalingau, kaya ada nang dicari.

“Napang ti Jal.. pina papalingau?” jar bini H. Ijuh batakun nang kaya sarius banar.

“Kada hammmm..? jar Ujal manyahuti santai.

“Aku kada parcaya amun kadada nang dimaksud ikam Jal ai,” pina banyaring bini H. Ijuh mambahas.

“Anu Cil ai,” ujar Ujal manyahuti bini H. Ijuh, ”nang kadada tu nang nyaman tangan, ha..ha..ha..” manyahuti sambil tatawaan wan bubuhannya galagakan.

“Nang bujurnya Cil ai…ulun ni ada nang ulun carii, sabab amun kadada..? hawai…hambar… rasanya,” jar Ujal manjalasakan supaya bini H. Ijuh kada sarik.

“ii…iii, ikam nangini mamadahakan banyu tih ulahanku kada manisaaah” jar bini H. Ijuh batambah sarik, sampai takipai gigi palsu sidin kasasarikan.

“Kada nang kaya itu pang … maksud ulun … nang ulun carii mulai tadi tu jamaah kita jua nang kada sing cangulan mulai tadi,” jar Ujal manjalasakan.

“Siapa Jal?” Usup batakun.

“Umai.. ikam kada tahuah..? UNDAS ... UNDAS … ,” jar Ujal mangancang.

Parahatan bubuhannya garunuman, singgah sapida mutur, orangnya ba dua, aksi banar urangnya, bakaca mata hirang, jakit kulit, salawar livis. Pina kada tahu-tahu ha urangnya.

“Tih is dua,” jar nang baduduk di balakang sapida mutur bapadah awan tukang warung.

Kalimbisikan bubuhannya di higa, ”siapa lah..” jar Ujal gagarunum.

“Takuni pang..Jal.” Ujar Aran manggasak Ujal.

“Takuni napa..? Ujal manjawab.

“Takuni mulai di mana, handak ka mana, atawa handak mancarii siapa..? Aran mamaksa Ujal supaya lakas batakun.

Ujal bawani batakun, “ Mulai di mana buhan pian nih.”

“Kami ni matan Banjarmasin” nang manyatang … basisingut ha pulang … manyahuti.

“Banjar nya di mana,” Ujal batakun lagi, sabab banjar tu luas.

“Badudua kami ni urang Kalayan,” jar nang basisingut manyahuti.

Taangkat burit Ujal mandangar urang Kalayan, sabab amun di Kalayan, banyak kula, ada jua sahabat Ujal nang ba uumuran bagawi di situ, kada dipindah-pindah orang pada Kalayan.

Rasa panasaran Ujal batakun lagi, “Di mana Kalayan ti..?”

Nang badua tadi hancap manjawab, “di Banjar tu Kalayan ada dua haja … Kalayan A awan Kalayan B, amun Kalayan T kadada”

“Ha..ha..ha.. tapakalah Ujal..!” ujar Usup, ngalih amun ilat pahuluan niti…kada mau tatinggal T…T…T…T..

(Kiriman Pa Syaifuddin Zuhri, 28 April 2014)