Asa Mailap-ilap

Tiap baisukan awan kamarian Undas tu mun ada di rumah musti minum kupi. Maulahnya kada tapi ngalih, sualnya kupi nang pacang diminum tu tinggal mambuka bungkusnya … dituang ka cangkir … diisi banyu panas … diharu awan sinduk, imbah tu diminumai lagi. Mun Undas sakaluargaan tulakan ka hulu sungai, mandatangi adingnya nang bagana di Kandangan awan ading bininya nang bagana di Amuntai, biasanya bininya atawa anaknya musti mambawa sarinting nang isinya sapuluh bungkus.

Kabiasaan Undas minum kupi tu sacangkir halus haja, tapi mahabisakannya lawas banar. Itu nang maulah bininya rancak gagarunum. Wayah maulah harus awan banyu nang hanyar manggurak, tapi maminumnya imbah dingin awan tunggal dikitan. Jadi mun nang bini handak babasuh piring awan cangkir, musti mahadangi Undas mahabisakan kupinya.

“Habisakan kupi ni nah,” jar bini Undas sambil manyimpuni piring, cangkir, awan pakakas lainnya nang rigat imbah tuntung makanan.

“Hadang dahulu lah,” sahut Undas nang lagi asyik manuntun tivi.

“Kaina ulun talambat turun bagawi,” jar bini Undas manggasak lakinya.

Undas takutan jua kalu pina bininya bamamai, maka inya badiri pada kadudukannya di muka tivi, lalu bajalan manuju ka mija makan. Dituntumnya cangkir sambil batingadah maminum kupi. Lawas pada biasanya Undas mahirup kupi sambil batingadah tu.

Bini Undas nang malihat kalakuan Undas kaya itu jadi tanganga. “Mun dituturutakan hati …,” jar bini Undas dalam hati, “kada kuulahakan kupi lagi.”

“Asa mailap-ilap nah,” jar Undas imbah tuntung mahabisakan kupinya.

“Napa handak minta ulahakan kupi lagiyah?” sahut bini Undas sambil marangut.

“Kada ah,” jar Undas sambil kakarinyum mancangangi bininya.

“Napa jadi baucap asa mailap-ilap?” jar bini Undas nang marasa bingung.

“Kupi nang diulah tadi tu rasanya manis badudi,” jar Undas.

“Hahahaha,” kikil tatawa bini Undas, “maaf … maaf … maaf … ulun tadi kada ingat maharu.”

“Kada papa,” jar Undas sambil kakarinyum malihat bininya tatawa, “rasa kupi hari ini sama awan biniku nang ada nih … manis bakatuha.”