Dipaksanya … Pangirak ai

Kaya biasanya … kamarian tu Undas bacungkungan duduk di warung nang sudah tutup. Biasanya jam nang kaya itu kakawanannya sudah takumpulan, tapi ini sudah jam lima an kadada an jua nang datang. Sambil batuhui Undas mahilangakan rasa muyak kada baisi kawan bapandir. Wayah Undas maningau ka kiri sakalinya talihat ada Wati bajalan ampah ka wadah Undas baduduk. “Nah … iya am ni … ampah basupanan aku,” jar Undas manggarunum dalam hati, sambil bapaling … lalu batunduk manggandang mija warung Undas manyambung garunumannya “mudahaaaannn … Wati kada malihat awan aku.”

“Undas,“ tadangar suara Wati bakuciak.

Undas bapaling malihati Wati … takajut inya, karna Wati sudah sing parakan badiri di hadapannya, bangsa sadapa jaraknya.

“Napa Wati,” jar Undas manyahuti awan suara inguh minta dikasiani.

“Napa jar ikam tadi di sakulahan Ndas?” magin bahangkui suara Wati batakun. Suara Wati tu sampai kadangaran buhan urang tuha nang badudukan di palatar langgar. Antara langgar awan warung wadah Undas baduduk jaraknya bangsa 10 mitiran.

“Nang mana tu?” jar Undas pura-pura kada ingat sambil batunduk kada wani mancangangi Wati.

“Napa jar ikam tadi Ndas … bunyi kalaras … kalaras?” jar Wati.

“Oh … nang itu ah … kalaras tu Wati ai daun pisang nang karing … kalaras tu biasanya jadi sarang kalalawar,” jar Undas pina basamangat manjalasakan.

Mandangar pandiran Undas tu, Wati maginnya sarik, “jadi … jadi … jadi ikam maanggap aku kalalawarah!” jar Wati sambil tapagat-pagat bapandir.

“Kada kaya itu pang Wati ai,” jar Undas.

“Napa maksud ikam sapuluh nang kaya aku ….” tacandak pandiran Wati karena mandangar ada suara urang tuha managur.

“Napa Ndas?” tadangar suara urang tuha. Kami badudua cangang ka arah suara, sakalinya Pangirak Aban sudah sing parakan. Urang tuha tu ngarannya Aban, jabatannya di kampung Pangirak.

Undas marasa ditakuni ulih Pangirak, lalu ai manyahut, “Nih … Wati nih … ulun sudah kada hakun … dipaksanya Pangirak ai.”

Mandangar suara Undas nang ma ada-ada, magin sarik Wati, “karamputinya Pangirak ai,” jar Wati bahangkui manyahuti.

“Sudah … sudah …, bulik ikam Wati ai, kada baik binian bajalanan wayah sanja, kaya kalalawar tu Wati ai, bila sanja inya tarabangan,” jar Pangirak manyuruh Wati bulik sambil bapapadah.

Wati nang disuruh bulik kada sing garakan pada wadah badirinya, sambil batunduk bakujat-kujat bahunya manahani tangis.

Pangirak bapaling sambil mancilingi Undas, lalu baucap, “ikam jua Ndas ai, bibinian dilawani, mambari supan tahulah, sudah … bulik dah … imbah tu turun ka langgar lah, kita sambahyangan magrib.”

“Inggih Pangirak ai,” jar Undas sambil mangalunyur bulik.