Finger

Sudah tuntung dua macam buhan KPPS maitung jumlah suara cagar wakil rakyat di DPR RI awan DPD. Mun ditarusakan maitung cagar wakil nang duduk di DPRD Provinsi, kayanya taranjah waktu magrib. Jadinya buhan KPPS baistirahat sampai jam dalapan malam. Sabalum bulikan, buhan KPPS badudukan sambil bapandiran.

“Parak saratus ikung buhan pamilih nang tadaftar kada datang lah,” jar Katua KPPS.

“Inggih,” jar Idar nang jadi angguta numur ampat, “nang tadaftar 406 ikung, nang datang 328 ikung,” sambungnya.

“Kaya apa lah supaya samua an urang nang tadaftar tu hakun datang ka TPS pas kagiatan pamilihan presiden kaina?” jar Katua KPPS.

“Ada ai,” jar Undas nang jadi angguta KPPS numur anam, “angguta KPPS tu jangan samua an lakian,” sambung Undas.

“Ngalih kaina Ndas ai mun ada angguta binian,“ jar Idar, “luntur pupur urang kaina, lalu ai kada nyaman dilihat.”

“Hahahaha … buhan binian tu jangan dijurungi gawian nang maulah bapaluhan Dar ai,” jar Undas.

“Nang mana Ndas gawian kita tu nang kada maulah paluh?” jar Idar batakun.

“Angguta numur anam awan tujuh tu kada tapi mauyuhi, bagus mun dijurung gasan binian,” jar Undas, “angguta numur anam tu gawiannya maarahakan urang nang sudah mancucuk mamasukakan kartu suaranya ka kutak suara … lalu nang numur tujuh tu gawiannya manunggui wadah tintah gasan manculup jariji,” sambung Undas manjalas akan.

“Bujur tu Ndas ai,” jar Amat nang jadi angguta numur tujuh.

“Buhan pamilih nang lakian tu mun diarahakan ulih binian … asa himung inya … iya kalu?” jar Undas maulahakan alasan parlunya ada angguta KPPS binian.

“Bujur jua pang mun nang kaya itu Ndas ai,” jar Idar nang sudah paham awan panjalasan Undas.

“Magin baik lagi mun wayah pamilihan kaina dipakai masin nang kaya masin absin di kantur atawa sakulahan,” jar Undas.

“Nang kaya apa tu Ndas?” jar Katua KPPS pina bingung, sualnya sidin tu wayah jadi pagawai dahulu balum manamui cara maabsin pagawai nang kaya wayahini.

“Itu nah Katua ai … di masin tu ada wadah nang bila kita rapatakan talapak ibu jari … masin tu babunyi kira-kira kaya ini nah … tarima kasih … pian sudah datang,” jar Undas.

“Oh … itu ngarannya finger Ndas ai … dimana pang dipasang alat itu,” jar Amat batakun.

“Di mija andakan wadah tintah,” jar Undas.

“Imbah tu pang kaya apa?” jar Katua KPPS nang magin basamangat handak tahu masin finger.

“Jadi kaina bila pamilih tu manculup jarinya ka butul tintah, fingernya babunyi,” jar Undas.

“Bunyinya … tarima kasih … pian sudah datang,” jar Katua KPPS maniru bunyi nang kaya di kantur atawa sakulahan, “nang kaya itu kah bunyinya Ndas?” jar Katua KPPS batakun.

“Kada,” jar Undas.

“Lalu kaya apa bunyinya?” jar Katua KPPS batakun.

“Bunyinya ah,” jar Undas, “tarima kasih … pian sudah manculup,” sambung Undas sambil badiri handak bulik ka rumah.