Handak Babini

Sagagaringnya Undas tu tatap haja bapisbukan. Sualnya mun kada mambuka pisbuk magin batambah garing inya. Hari itu pina marista Undas bakumantar Kalakuan Undas bakumantar nang kada kaya biasanya tu sakalinya ada nang mamparhatiakan. Binian nang mamparhatiakan tu.

“Pian garing ah Ka Undas?” ujar binian tu manakuni Undas di halaman fisbuk nang gasan bacacatingan.

“Napang … ada nang mahabari pian ah?” jar Undas.

“Kadada pang nang bahabar … tapi mun ulun baca kumantar pian hari ini pina kada kaya biasanya,” jar binian tuh.

“Maksudnya?” jar Undas pina bahimat manakuni.

“Biasanya kumantar pian tu maulah urang tatawa, hari ini kumantar pian pina marista Ka ai,” jar binian tu manjalasakan.

“Bujur ai … aku lagi garing Ding ai,” jar Undas pina mangijil.

“Garing napa pian Ka?” jar si binian.

“Takanan darah tinggi Ding ai … kapala asa hanyut tarus, makanya am aku ni bagana di rumah haja,” jar Undas.

“Kasiannya pang pian Ka lah,” jar si binian.

“Ya am tu Ding ai, kaya ini pang sakalinya mun jadi urang garing,” jar Undas marista.

“Barapa hari sudah pian garing Ka Undas?” jar si binian.

“Labih saminggu dah,” jar Undas.

“Umailah … jakanya ulun di Banjarmasin Ka Undas ai … ulun atari kuini awan durian tu pang Ka ai,” jar si binian.

“Ha …,” jar Undas takajut, “itu pacangan mamati i ngarannya.”

“Ai … kanapa jadi bisa kaya itu Ka Undas?” jar si binian.

“Urang darah tinggi tu Ding ai … kada bulih mamakan kuini atawa mamakan durian … bisa babangat garingnya,” jar Undas.

“Mun kaya itu … pian minta kawani haja gin lah,” jar si binian tu batakun.

“Kada ah,” jar Undas.

“Mbah … pian handak apa garang?” jar si binian maanyaki batakun.

“Kada usah ku sambat gin kalu … ikam kada kawa jua manulusakan kahandak ku Ding ai,” jar Undas.

“Ai … bisa kaya itu … kaya apa handak manulusakan mun kahandak pian kada disambat … sambat dahulu kahandak pian Ka Undas ai,” jar si binian.

“Mun kusambat … jangan sarik ikam Ding lah,” jar Undas.

“Kada sarik Ka ai … dijamin ulun kada pacangan sarik awan pian ni Ka Undas ai,” jar si binian.

“Jakanya a lah … jakanya ikam ni Ding ai hakun ku kawini … kaya apa?” jar Undas.