Cung

“Hari ini lakiku kada kuhirani,” jar Wati bakakajutan baucap wayah kakawanannya lagi aur mancatati ngaran-ngaran nang handak dicucukakan asal gawiannya. Kakawanan Wati nang lagi bagawian cagatan awak, imbah tu galagakan tatawaan. Sualnya kalakuan Wati tu kada kaya biasanya.

“Napang jadi pina bamamai?” jar Undas batakun awan Wati. Baastilah Undas ampih mangatik di komputer, lalu ditarusakannya tatakunan tu awan papadah, “Kada bulih Wati ai kada bahiranan awan laki.”

“Kada tahuwai … napang kalakuan kaya nang kada ingat lagi awan bini,” jar Wati maungkai kakasalannya.

“Ai … mun kada ingat lagi awan bini … kita atar ka Sambang Lihum … kaya apa?” jar Undas manyahut sambil mahuhulut Wati. Galagakan pulang kakawanan tatawaan di ruangan.

“Ikam ni Ndas ai macam-macam haja,” jar Wati sambil manciling-ciling mancangangi Undas, panas hati Wati mandangar pamandiran Undas, lalu disambungnya, “maksudku tu kada kaya itu pang.”

“Napa jadi ikam padahakan kaya kada ingat lagi awan bini?” jar Undas batakun, kakawanan nang lain kada wani babunyi lagi.

“Laki ku tu nah … wayahini bulik batangah malaman, imbah sampai di rumah langsung guring,” jar Wati.

“Hah !” jar Aran langsung manyambar pandiran Wati, “ada haraguan nang lainah?” sambungnya.

“Kada,” sahut Wati, “lakiku tu ada gawian di kanturnya, sualnya ada cagar pamariksaan,” sambung Wati manjalasakan.

“Baarti gawian laki ikam tu Wati ai kada manyalah … jangan kada dihirani … kauyuhan kalu laki ikam tu Wati ai,” jar Undas, “baiknya tu ikam uruti pang awaknya … supaya sigar inya … hehehehe,” sambung Undas sambil mahuhulut.

“Kada ah … ba a pang mauruti … laki ku tu batilpunan kawa haja … manjapai bini kada kawa … cuba … talalu banar kalu?” jar Wati pina sangkal banar.

“Ooohhhh … marga kada manjapai banarai leh,” jar Aran, “imbah laki ikam tu guring pang … apa nang ikam gawi Wati?” sambung Aran.

“Nyata ai,” jar Wati, “kalah bini awan tilpun, jadi dikaguringan ku ulah pahalat awan guguling.”

“Hahahaha … biniannya maulah garis demarkasi Ran ai,” jar Undas mamandiri Aran.

“Kaya apa caranya Ndas mun handak mamindah garis demarkasi tu?” jar Aran manakuni Undas.

“Lakinya Wati tu harus baucap cung dahulu ….” Jar Undas.

“Hi ih … sambil maangkat tangan kanan awan manunjuk ka atas,” sambung Aran.