Baranak

Wayah bininya batianan, Undas mambawa bininya bamalam di rumah kuitannya. Kuitan Undas himung banar karna cucunya nang pamulaan cagar diranakakan di rumahnya. Abut kuitan Undas basasangga di rumah supaya nang minantu kada umpat bagawian. Sualnya kuitan Undas takutan, mun minantunya umpat bagawian, kalu pina cucu nang masih dalam parut balakas mangaluar.

Kamarian tu bini Undas kujul-kujul kasakitan parut, mamanya Undas abut mangulai parut bini Undas awan minyak kayu putih. Abahnya Undas kada karuan rasa mandangar minantunya ayangah-ayangah kasakitan parut, diambilnya henpon, lalu ditelponnya Undas, “Ndas … ikam dimana?”

“Napa Bah? Ulun di pos kamling Bah ai,” jar Undas manyahuti.

“Bini ikam sakit parut Ndas ai, lakasi ambili bidan lah,” jar abahnya Undas manyuruh.

Undas imbah mahidupi sapida mutur langsung mangalunyur ka rumah bidan. Abahnya Undas nang mahadangi di rumah magin kada karuan rasa karna Undas kada sing datangan imbah disuruh maambili bidan. Marasa kalawasan mahadang, abahnya Undas manelpon sambil bakuciak, “Ndas! Ikam masih di pos kamling ah?”

Undas mandangar suara abahnya nang manyanyarik langsung manyahut, “Ulun lagi di kampung tujuh Bah ai.”

“Ikam tadi kusuruh maambili bidan kalu?” jar abahnya Undas.

“Inggih Bah ai, ni ulun lagi maambili bidan,” sahut Undas.

“Jauhnya pang ka kampung tujuh, di kampung satu nang parak ni ada ai bidan Ndas ai,” jar abahnya Undas.

“Baranak bidannya Bah ai,” jar Undas manyahuti awan suara pina marista.

“Amun nang di kampung satu bidannya kada kawa diambili, ka kampung dua aturannya ikam tu Ndas ai maambili bidan, kada nang langsung ka kampung tujuh,” jar abahnya Undas pina balamah suara, tapi masih sangkal.

“Inggih Bah ai, ulun sudah malihati ka muka rumah bidan, mulai kampung satu sampai kampung anam samuaan bidan baranak Bah ai,” sahut Undas sambil basuara magin marista.

“Ikam singgah lah ka rumah bidannya Ndas?” jar abahnya Undas batakun.

“Kada Bah ai,” jar Undas.

“Napa jadi ikam tahu bidannya baranak?” jar abahnya Undas magin maanyaki batakun.

“Ulun mambaca pangumuman nang ada di muka rumah bidan tu Bah ai, jadi ulun tarus ai ka rumah bidan nang lain, sampai ka kampung tujuh nih,” jar Undas manjalasakan.

“Napa isi pangumumannya Ndas?” jar abahnya Undas batakun.

“Di muka rumah bidan tu ada tulisan BIDAN BARANAK Bah ai,” jar Undas.

“Bech! Dasar ikam tu Ndas ai,” jar abahnya Undas bakuciak.

Tinggali lah

Kamarian tu Undas bakakawanan di tangsi tantara. Awan kakawanannya nang buhan anak tantara tu Undas biasanya manuntun buhan tantara latihan orkes keroncong. Undas, Ujang Kadut, Welly Warman, awan Bambang Langai duduk balapak bajijir di higa urang nang mamainakan gitar ganal badiri. Di situ haja pang wadah duduk nang pina kadada urangnya, di lain ada jua nang dudukan, ada tantara, ada jua bini tantara. Bagantian buhan tantara awan bini tantara banyanyi. Nang kada banyanyi … sambil mandangarakan nyanyian kawannya ada nang mahiringakan awak ka kiri ka kanan sasuai irama lagu.

Undas awan kakawanannya imbahanu babisik-bisik lalu tatawaan. Nang rancak dibisikakan buhan kakawanan Undas tu kalakuan tukang piul nang gulunya pingkur tarus bila mamainakan orkes.

“Gulu sidin tu pina pingkur … mun tiap hari latihan … busialah salajur kaya itu,” jar Welly sambil babisik ka talinga Ujang Kadut.

“Husss … kalu kadangaran sidin …,” jar Ujang Kadut sambil manutupi muntungnya awan talapak tangan kanannya manahani tatawa.

Kalikikan Undas awan Bambang sambil manutupi muntung imbah mandangar pandiran Welly awan Ujang Kadut. Ampih kalikikan buhan nang baampat tu imbah mandangar ada suara mulai dalam rumah, “Undas … sini pang.”

“Inggih,” jar Undas sambil badiri … lalu bajalan satangah bukah masuk ka dalam rumah.

“Ini nah … bawai ka luar,” jar bini tantara nang mangganai rumah sambil manunjuk dua piring ganal nang baisi gaguduh, baisi gumbili bajarang, ada jua cipir nang baisi cangkir batingkulup awan dua buah cucut.

“Inggih Bu ai,” jar Undas sambil bajungkuk handak maangkat piring nang baisi gaguduh awan gumbili bajarang.

“Tunggal butingan haja Ndas ai,” ujar si ibu managur Undas, “gaguduh awan gumbili bajarang tu masih panas Ndas ai,” jar si ibu manyambung.

“Inggih,” jar Undas sambil badiri maangkat piring nang baisi gaguduh, lalu bajalan ka luar. Imbah maandak piring nang dibawanya di parak buhan tantara, Undas babisik awan kakawanannya, “dangani pang.”

Kakawanan Undas badirian, lalu bajurut bajalan masuk ka dalam rumah sambil bagayaan. Sabuting saurang buhan Undas mambawa makanan awan minuman ka ruangan urang nang lagi baorkesan. Imbah maandak makanan awan minuman, Welly mambalik cangkir nang ada dicipir, Bambang manuangakan kupi awan teh ka dalam cangkir, Ujang Kadut maandak piring nang baisi gula sakar awan gumbili bajarang, sapiring diandak ka kumpulan lakian, sapiring lagi diandak ka kumpulan binian.

Nang mamainakan akordion mancangangi Undas, lalu mambari tanda awan muntung nang diluncupakan ampah ka gaguduh. Paham awan tanda, Undas langsung maangkat piring gaguduh, lalu diatar ka pamain akordion. Pamain akordion awan tangan kirinya maambil sabuting gaguduh, tarus maigut sampai panggal.

“Hanas … hanas,” jar pamain akordion nang takajut awan rasa panas gaguduh dalam muntungnya. Buhan pamain orkes nang lain awan nang manuntun orkes tatawaan mandangar suara pamain akordion.

Undas tarus mambawa piring gaguduh bakuliling, pas parak awan pamain piul, isi piring nang di tangan Undas masih ada dua buting gaguduh. Undas kada wani manyurung piring gaguduh ka pamain piul, tapi imbah Undas handah bajauh, pamain piul baparak, sambil babungkuk tukang piul babisik ka talinga Undas, “tinggalilah … tinggalilah …,” jar tukang piul.

Takulibi

Nang ngaran hanyar dapat cucu, nining kada tapi kawa lapas mata malihati cucu … ada haja alasan si nining … gair kalu diigut nyamuk lah si cucu atawa kalu pina dihurung samut lah. Kai malihat si nining pina kada mangaruan manyanga iwak … napang mun haur bulang bulik antara mambalik iwak nang disanga awan cucu nang lagi barabah dalam kalambunya … laluai kai baparak awan nining nang lagi bajungkuk maitihi pacucuan.

“U ning,” ujar kai sambil manangkap tangan nining nang parahatan handak badiri.

“Napang,” jar nining manyahut.

“Kira-kira mun sudah baumur satahun … cucu kita ni bisa lah bamainan,” jar kai batakun awan nining.

“Bisa,” jar nining pina tagas, “biasanya mun sudah baumur satahun … bayi tu sudah mulai balajar bajalan,” jar nini manguatakan pandapatnya.

“Awan siapa kira-kira cucu kita ni bamainan,” jar kai batakun pulang.

“Awan kita ni pang,” jar nini.

“Pacangan manuha pikiran cucu kita ni ning lah,” jar kai.

“Kaya apa pang mun dijiran kita ni kadada urang nang sapantaran cucu kita,” jar nini pina bingung mamikirakan cagaran kawan cucu bamainan.

“Handak lah cucu kita ni baisian kawan sapantaran inya,” jar kai.

“Handak … kaya apa caranya?” jar nining batakun.

“Mun kita ulahakan pang gasan kawan cucu kita bamainan … kaya apa?” jar kai sambil kakarinyum.

“Hah …,” jar nining takajut sambil manciling, lalu bapaling malihati sangaan iwak sambil bakulibi

Nang Nyaman Dimakan

Kamarian, balum lagi sampai waktu urang sambahyang ashar, bini Undas pina abut basisiap handak ka pasar wadai mancari pambukaan. Sualnya di kampung Undas tu mun sudah liwat pada jam 4 atawa imbah tuntung sambahyang ashar, maka urang nang bajual wadai gasan babuka puasa sudah mulai basisimpun handak manutup warung.

"Bah ...," jar bini Undas batakun, "pian minta tukarakan apa gasan buka puasa kaina."

"Pacal awan ampal haja Yang ai," jar Undas sambil manyirit mata ka arah anak-anaknya.

Takulibi anak-anak Undas mandangar abahnya bapandir awan umanya pina lanji, lalu babisik-bisik buhan kakanakan nang badangsanakan tu sambil kalikikan mananawa akan.

"Tukarakan bingka Ma ai," jar anak Undas.

"Bingka haja ka Bah," jar bini Undas ma anyaki batakun awan nang laki.

"Kamanisan," jar Undas manyahuti, "kada nyaman dimakan wayah puasa nang kaya ini nih."

"Sarikaya pang Bah," jar anak Undas mangganti pasanan wadai gasan babuka puasa.

"Kada nyaman jua," jar Undas sambil mambalakangi bininya, sualnya Undas lagi asik mambaca tulisan nang ada di layar komputernya.

"Maka pian biasanya pambanyaknya mamakan wadai nang dua macam tu ... nangapa jadi dipadahakan kada nyaman," jar anak Undas sambil mamaraki abahnya, lalu malihati tulisan nang dibaca abahnya.

"Hih ..." jar anak Undas manyambung pandirannya, "ulun kira pian lagi mambaca habar tentang wadai nang dua macam itu."

"hahahaha ... kadada nang mahabarakan nang kada baik pang tentang wadai nang dua macam itu," jar Undas manyahuti.

"Nangapa jadi pian mamadahakan wadai nang dua macam tu kada nyaman," jar anak Undas magin bingung awan pamandiran abahnya.

Bini Undas bulang bulik ka kamar kada karuan nang digawi ... bingung mahadangi pasanan wadai nang dikahandaki Undas awan anak-anaknya.

"Handak tahu lah nang nyaman dimakan wayah puasa ni," jar Undas batakun sambil bapaling mahadapi anaknya.

"Nangapa tu Bah," jar anak Undas.

"Liur," jar Undas.

"Hah !" jar anak Undas sambil tanganga.

"Amun bingka ... sarikaya ... putri selat ... amparan tatak nang dimakan wayah puasa, batal puasa ... awan katahuan urang kada puasa," jar Undas sambil kukurihing manjalasakan alasannya mamadahakan wadai tu kadada nang nyamannya, "amun liur ditaguk ... kadada nang tahunya ... iya kalu?" sambung Undas manutup papadahnya.

Kada Dihurupakan

Hari Ahad tu kawan sarantang-saruntungnya Undas wayah sakulah bahari mangawinakan anaknya. Undas disuruh kawannya tu mahadangi kakawanannya nang saruan … istilahnya manjaga tamu. Kakawanannya mulai datangan saruan sakitar jam sapuluhan, magin tinggi ari magin babanyak kakawanannya nang datang. Kakawanannya nang datang disuruh Undas makan dahulu, imbah tuntung makan, ditariknya kakawanannya ka halaman rumah urang nang mahadap ka arah masuk urang saruan.

Udin nang panyawatnya datang saruan, “supaya batamuan awan kakawanan bahari,” jar Udin sambil manarik bangku marapatakan awan kadudukan Undas.

“Hi ih Din ai,” jar Undas manyahuti, “wayah nang kaya ini nipang kita ni kawa bakumpulan awan kakawanan,” sambung Undas sambil mangitar bangkunya.

Udin cagat pada kadudukannya wayah malihat rumbungan binian nang saruan … maklum Udin ni tumatan bahari tamasuk liur baungan. Tapi sampai wayahini bininya kada sing tambahan, mulai pamulaan kawin bininya tatap nang itu-itu haja. Muntungnya haja nang kada panahanan mun malihat binian nang langkar.

“Napang Din … kaya karung hibak awan baras ha … kakanyangan naahhh,” jar Undas manakuni Udin.

“Tu nah Ndas … tuha kada anum kada … pina langkar sabarataan nang saruan nih,” jar Udin sambil mancangangi rumbungan binian nang hanyar datang.

“Kayu gin langkar mun dipakaiani,” sahut Undas sambil mancangangi ka arah nang dicanganginya Udin.

“Hahahaha … bujur tu Ndas ai,” jar Udin, lalu disambungnya pandiran tu awan tatakunan, “mun nya binian nang baampat tu minta kawini pang … kaya apa?”

“Kaampatnya tu ah?” sahut Undas.

“Hi ih,” jar Udin.

“Kada hakun aku Din ai, sualnya kita ni kada bulih babini labih pada ampat ikung,” jar Undas.

“Ha ... ha … ha … ha …,” sing hangkuian Udin tatawa mandangar jawaban Undas, “mun buhan nang baampat tu mambawai bahurup pang … hakunlah,” sambung Udin.

“Kada jua,” jawab Undas.

“Nangapa jadi kaya itu Ndas?” jar Udin, “kan kada malanggar aturan agama.”

“Napa nih … pina rami banar bakisahan,” bakakajutan bini Undas sudah badiri di balakang Udin.

“Nih … Udin nih … kalakuan,” jar Undas sambil manarik tangan bininya, “biniku ni Din ai … umpamanya ada sapuluh ikung bintang filim nang minta kawini asal hakun malapas bini nang ada … tatap kada hakun aku Din ai.”

Kakarinyum sambil bagarak-garak hidung bini Undas kahimungan mandangar pandiran lakinya.

“Nangapa jadi kaya itu Ndas?” jar Udin sambil matanya manyirit bini Undas.

“Ha ... ha … ha … ha …,” Undas manggalagak manawa akan Udin, lalu ditarusakannya pandiran, “kada mayu awaknya Din ai mahadapi bini maampat-ikungan.”

“Nang ada ni gin kada habis,” jar bini Undas umpat manyahuti.

Udin tanganga mandangar sahutan Undas laki binian.