BAJUAL BULU

      Mulai Kandangan Undas mambawa kula nang handak bulik ka Gambut. Ujal ngarannya, mun bapandir sidin tu katahuan banar gasan urang Kandangan. Kaharatan urang Kandangan tu paling kada hakun manyambat huruf O, huruf O itu pasti diubahnya jadi huruf U mun bapandir. Urang banua lain kadada nang bisanya maubah huruf mun bapandir.
      Ujal duduk di muka batatai awan Undas. Bini Ujal duduk di balakang batatai awan bini Undas. Satumat-satumat tadangar buhan binian nang duduk di balakang kalikikan tatawaan. Kisah nang maulah tatawaan buhan binian tu imbahanu tadangar jua ulih Undas awan Ujal, jadi umpatan jua tatawa.
      Pas sudah handak masuk Matapura, Ujal bapandir, “di sini Ndas ai … bajual bulu haja manyugih.”
      “Bulu hayam ah?” jar Undas nang mangira pandiran Ujal tu usaha nang bahubungan awan badminton.
      “Kada,” jar Ujal.
      “Di sini pinanya kadada urang maharagu biri-biri,” jar Undas pulang.
     “Bulu manusia Ndas ai,” jar Ujal, “Cuma aku nang kada tahu tu Ndas ai … bulu nang kaya apa nang dijual urang di sini jadi bisa manyugih.”
      “Bujur-bujur bapandir Jal ai,” jar Undas.
     “Nah … kada parcaya Undas nih,” jar Ujal, “tuh cuba lihati … sapanjang jalan banyak banar kulihat tulisan … tuh … nang kaya itu nah,” sambung Ujal sambil manunjuk tulisan di muka warung wadai.
      “Hahahaha … itu bolu Jal ai … lain bulu,” jar Undas sambil tatawa.