Dibaca Barang

Nang ngaran guru, mun imbah mambari palajaran, handak ai tahu kamampuan muridnya manarima pelajarannya. Gawian mancari tahu kamampuan murid itu ada nang ngarannya ulangan harian, ada ulangan tengah semester, ada ulangan semester, ada jua nang ngarannya ulangan kenaikan kelas. Itu mun gawian di sakulahan. Mun gawiannya di penataran, ngarannya pretes bila digawi sabalum penataran, mun digawi imbah penataran … ngarannya postes.

Undas tamasuk di antara kakawanannya nang diistimewakan wayah umpat panataran, yaitu kada parlu umpat pretes awan postes, jadi datang kawa lambat … buliknya kawa badahulu. Kakawanannya ada nang baucap, “datang sudah talambat, buliknya barang badahulu.” Undas takurihing mandangar pandiran kakawanannya.

“Tanang haja … soal postes tu gampang, inya soal pretes tu jua nang diputar-putar panitia,” jar Undas manyahuti pandiran kakawanannya sambil mangalunyur ampah bulik.

Malihat buhan panitia masukan ka ruangan, kakawanan Undas bagagas masuk ruangan, tarus baduduk di kursi nang sudah ada di ruangan. Masing-masing kakawanan Undas maandak henpon atawa ipad atawa laptop di atas mija nang ada di hadapannya. Panitia pina sarius mambagi soal-soal postes ka hadapan kakawanan Undas.

Kakawanan Undas ada nang langsung maambil lembar jawaban dan kada maherani lagi awan soal postes, tapi ada jua nang sambil mambaca soal postes. Nang sama kalihatan awan buhan kakawanan Undas itu dahi kadada nang bakarinyut, nang ada tu takarinyum barataan.

Kada sampai sapuluh manit imbah soal dibagi, Imbran bajalan mandatangi mija panitia, lalu manjurung lembar jawaban nang sudah baisi. Kada sawat lawas, Amir pulang nang maatar lembar jawaban ka mija panitia. Panitia nang bibinian ciling-ciling mancangangi Imbran awan Amir, lalu bajalan mandatangi buhan nang umpat postes. Dilihatnya kakawanan Undas nang masih balum mangumpul lembar jawaban banyak nang kada mambuka soal. Nang digawi kakawanan Undas tu imbah mambaca tulisan di laptop atawa ipad atawa henpon lamsung mancurit di lembar jawaban.

“Talalunya pang buhannya nih … jaka dibaca barang soalnya,” ujar si panitia sambil bajalan ka muka sambil marangut.

“Mambuang-buang waktu haja mambaca soal tu Bu ai,” jar Marwan nang duduk paling balakang sambil mambisiki Amran.

Katulahan

Asik banar Undas bakisahan di ruang guru awan buhan guru. Kada banyak pang buhan guru nang ada di situ, sualnya guru nang lainnya ada di kalas maajar murid-muridnya. Satumat-tumat galagakan buhannya tatawaan imbah mandangar kisah bahari wayah takumpulan kuliah. Imbran nang pina musti bakisah wayah inya hanyar masuk kuliah diposma urang. Lagi rami-raminya bakisahan, bakakajutan Imbran basuara nyaring.

“Napa nak,” jar Imbran sambil mancagatakan gulu mancangangi dua ikung muridnya nang badiri di muhara lawang ruang guru.

“Disuruh Bu Isyah Pa ai,” sahut muridnya nang bangaran Ida.

“Disuruh sidin nangapang?” jar Imbran batakun.

“Maandak pe er kami ka mija sidin Pa ai,” jar Ida.

“Oh … iya ah, tu nah mija sidin,” jar Imbran sambil manunjuk mija Bu Isyah.

Ida awan kawannya bajalan ka mija Bu Isyah, imbah maandak buku-buku pe er, Ida awan kawannya bagagas kaluar ruang guru.

Undas sambil matunduk kakarinyum. Imbran nang malihat kalakuan Undas pina kada mangaruan, lalu ai batakun, “napang nang ditatawa akan Ndas?”

“Kada ai,” jar Undas manyahut, “… murid-murid di sini wani basisi awan guru leh,” sambungnya.

“Ya am tu Ndas ai …,” jar Imbran, “mun kita bahari Ndas leh … kadada nang waninya manyambat ngaran guru … takutan katulahan,” sambung Imbran basamangat mambanding kalakuan murid wayahini awan kalakuan murid bahari.

“Sabujurnya …,” jar Undas, “manyambat ngaran guru itu kada talalu salah jua … parasaku nang babahaya tu bila murid mangiyau gurunya atas dasar mata pelajaran.”

“Kada bagus Ndas ai basisi awan guru … ujar urang bahari bisa mangatulahani … mun aku Ndas ai suka dikiyau murid badasarkan mata pelajaran pang,” jar Imbran mangaras.

“Nyaman ai ikam ni Mbran ai … maajar sejarah pang … jadi dikiyau Bapa Sejarah,” sahut Undas.

Imbran takarinyum mandangar sahutan Undas, “manang aku sakali ini malawani Undas,” jar Imbran dalam hati.

“Amun ikam maajar agama … kaya apa Mbran?” jar Undas batakun awan Imbran.

“Kada papa … kiyau haja aku Bapa Agama,” sahut Imbran.

“Mun ikam maajar pengetahuan untuk menganalisa sebuah kata berbahasa Arab ketika dalam keadaan berdiri sendiri pang,” jar Undas batakun pulang.

“Pelajaran napa itu Ndas?” sahut Imbran.

“Ilmu Sharaf … hakun lah ikam Mbran dikiyau Bapa Sharaf,” jar Undas sambil kakarinyum mancangangi Imbran.

Imbran sindam mandangar tatakunan Undas.