Rame Undas bakisahan awan kakawanannya di kantur. Nang dikisahakan hari
itu tamasuk nang panting, karna ada hubungannya awan piring nasi guru.
Kisahnya, tiap sakulahan harus malapurakan absin guru-gurunya di sakulahan
bulan April, Mai, awan Juni. Lapurannya harus ada tanda tangan pengawasnya.
Nang jadi masalah tu ada sakulahan nang lapurannya dibulikakan bagian
sertifikasi dinas karna kada batanda tangan pengawas. Ada jua nang format
lapurannya kada sama awan edaran dinas. Bubuhan pengawas malihat lapuran
sakulahan kada sama padahal kagiatannya sama, mangira sakulahan kada samuaan
manarima edaran dinas. Lalu ai buhan pengawas asing-asingnya manelpon sakulah
binaannya mahabari masalah lapuran sertifikasi.
“Umpat batakun lah,” jar guru nang hanyar masuk ka ruangan pengawas.
“Ada apa Bu,” jar Undas manyahuti guru nang batakun.
“Handak manamui Pa Amir Pa ai,” jar si guru.
“Sidin ma-akreditasi Bu ai,” jar Undas.
“Kira-kira sidin datang ka kantur jam barapa Pa,” jar si guru.
“Pian handak maurus apa garang Bu,” jar Undas balik batakun.
“Minta tandatangan sidin Pa ai, sualnya absin guru harus ditandatangani
sidin dulu hanyar dikumpul ka dinas,” jar si guru manjalasakan tujuan inya
datang ka ruang pengawas.
“Nah am, mun nang itu pian bangalih sadikit lah, sualnya Pa Amir itu
samingguan ini kada tantu ka kantur, kacuali ada kaparluan,” jar Undas sambil
matanya mancangangi papan tulis di dinding ruangan nang ada ngaran bubuhan
pengawas awan nomor telponnya. Si guru tanganga bingung mandangar pamandiran
Undas.
“Tu nah,” jar Undas sambil manunjuk papan di dinding nang ada tulisan
ngaran buhan pengawas, lalu sambungnya, “cuba pang telponi sidin, bapadah pian kaparluan
tanda tangan sidin di absin guru-guru gasan sertifikasi.”
“Kada sarik lah sidin, lagi aur ulun telpon,” jar si guru nang pina
takutan manelponi Pa Amir.
“Absin guru ni paling lambat hari ini kalu mangumpulnya,” jar Undas
manakuni si bibinian. Lalu Undas manarusakan pandirannya, “biasanya buhannya tu
tuntung mancucukakan data di sakulahan kira-kira jam duaan, mun di kantur
kadada gawian buhannya tu tarus bulik ka rumah mamasukakan data ka aplikasi.
Nah ... tinggal pian haja lagi nang manantuakan, manelpon sidin supaya tanda
tangan tuntung hari ini atawa mahadang sampai minggu kaina hanyar tatamu sidin.”
Si guru mancangangi jua ka daftar ngaran pengawas, lalu mancatat numur
hapi Pa Amir. Si guru baunggut sambil mancangangi Undas, “ulun kaluar manilpon
sidin dulu Pa lah.” Undas baunggut sambil takarinyum, lalu manarusakan gawian
awan laptopnya.
“Sudah ulun tilpon sidin Pa ai, kaina satangah dua sidin ka kantur,” jar
guru tadi babulik mendatangi Undas. “Ulun tadi tatamu bini pian di bawah, ulun
taimbai mulai kuliah” jar guru manyambung pandirannya awan Undas.
“Kaya itu kah, pian maajar dimana Bu,” jar Undas batakun.
“Ulun maajar di SMP Mapan Pa ai,” jar guru.
“Pa Sutil masih ai kalu jadi kepala SMA Mapan?” jar Undas sambil
manarusakan batakun, “tahu ai kalu pian awan Pa Sutil.”
“Ai ... pian kada tahu ah ... sidin sudah meninggal, minggu tadi
manyaratus,” jar guru.
“Nah ... kada tahu habar am, padahal kami mulai kuliah rancak bagayaan,”
jar Undas.
“Payah banar lah, meninggal kada bahabaran,” jar Udin nang duduk di buncu
bakakajutan umpat bapandir.
Samuaan nang mandangar pandiran Udin kada sing bunyian lagi.
