PELEPASAN

Samalam, hari Senin tanggal 19 Desember 2016, buhan pegawai kota Banjarmasin babaju Korpri. Seragam Korpri biasanya dipakai gasan apel tanggal 17 setiap bulan, tapi karena tanggal 17 Desember 2016 pas hari Sabtu, hari parai buhan pegawai, maka apelnya dimundur ke hari Senin. Imbah tuntung apel di muka kantor Pemko, takumpulan buhan pengawas sekolah di Dinas Pendidikan Kota Banjarmasin. Sambil minum banyu, hehehe kadada pang mun minum wadai, baricau buhannya bakisahan.

"Terakhir apel di Pemko," jar Ami nang gawiannya jadi Pengawas SMA, merasa yakin mulai Januari 2017 sudah bapindah jadi pegawai Dinas Pendidikan Provinsi Kalsel.
"Sakali lagi buhan pian diacara akan Pemko bulan Desember ni," jar Undas manyahuti pamandiran Ami. Undas baucap mudil serius sambil cangang ka muha Ami. Kakawanan nang ada di ruangan kadada nang bapandir lagi, muha samuaan maarah ka wadah Undas.

"Beh ...," jar Ami mudil kada yakin awan pamandiran Undas.

"Naaahhhh ... ingatakan ja," jar Undas manyahuti, "kira-kira acaranya baimbai awan acara tahun baru."

Kakawanan Undas makin serius mandangarakan, sualnya marasa dapat perhatian walikota.

"Kaina," jar Undas, "nang diacara akan tu kada buhan pengawas nang pindah ka provinsi haja, buhan guru nang pindah ka provinsi gin umpat dikumpul jua di acara tu," sambung Undas.

"Wah ... bagus banar tu, baarti walikota kita tu perhatian banar awan buhan guru lih," jar Ami mengomentari kebijakan walikota.

"Acaranya habarnya di halaman Pemko, buhan nang pindah samuaan diundang ka acara pelepasan," jar Undas pina kaya tahu banar acaranya.

Karna kakawanan kadada nang bapandirnya, Undas manarusakan kisahnya.
"Samuaan nang diundang disuruh bakumpul di pinggir sungai nang di muka Pemko, lalu ...," tasatup pandiran Undas karna langsung disahut ulih Iwan.

"Dicaburakan ka sungai," jar Iwan sambil tatawa.

Samuaan kakawanan nang ada dalam ruangan umpat jua tatawaan, lalu masing-masing maambil tas tarus bajalan ka luar ruangan.

LAIN SOPIR TAKSI

Undas sakaluargaan bulikan dari Kotabaru tamasuk sungsung pada urang lain. Subuh tu ipar Undas imbah bulik di masigit langsung mamanasi mutur. Nang di dalam rumah mandangar suara mutur, balaju manyimpuni bawaan supaya lakas diangkut ka mutur. Imbah simpun bawaan diandak husus di baris ketiga, lalu buhan binian batiga duduk di baris kedua, Undas duduk di muka batatai iparnya nang batugas manyupir.

Turun dari Gunung Sentral parak simpang ampat Undas bapandir, "kita ka pasar dulu, mancari nasi kuning."

"Kada usah, kita manyampati umpat feri," jar ipar Undas nang manyupir.

"Mun kaya itu pas simpang ampat tu piluk kiri, sudah itu lurus haja," jar Undas mamadahakan jalan manuju Tanjung Serdang.

Dudukan di baris kedua bajejer bini Undas, adingnya nang binian awan kamanakannya nang binian jua. Rame nang batiga ni bapandiran. Nang paiyanya bakisah bini Undas, adingnya sadikit-sadikit haja bapandir, nang kamanakan umpat tatawa haja.

Pas parak Sungup, adingnya bini Undas mambuka bungkusan nang disangui kula. Isi bungkusan sakalinya wadai untuk bainti. Sambil bapandiran nang batiga tu sambil makan untuk. Takulum-kulum bini Undas bakisah, napang mun bakisah sambil mamamah untuk.

Mutur jalan tarus, pas di simpang tiga parak pelabuhan feri, Undas kada sampat mamadahi laluwai mutur tatarus arah ka Lontar, untung kada jauh talewatinya langsung babulik. Parahatan manukar karcis gasan manyubarang, mutur buhan nang tadahulu mulai masukan ka feri, "alhamdullilah," jar Undas dalam hati. Mutur buhan Undas kawa jua umpat feri nang cagar manyubarang ka Batulicin.

Perjalanan manyubarang awan feri lancar awan kadada galumbang, lalu perjalanan mutur arah ke Pagatan sampai jembatan parak pasar aman dan lancar. Turun jambatan parak pasar Pagatan mutur harus piluk kiri, ini nang maulah Undas kada karuan rasa, karena ngalih mancari warung makan. Imbah piluk kiri kikira 50 meter piluk kanan sampai dua kali simpang ampat piluk kanan pulang lurus sampai tatamu jalanan maminggir, sapanjangan kadada urang bajuan nasi.

"Lain jua sakalinya supir taksi awan supir pribadi ni leh," jar ading ipar baucap sambil manyupir.
"Nyata ai," sahut Undas, lalu ditarusakannya, "mun supir taksi dibayar penumpang, mun supir pribadi penumpangnya papadaan, jadi kada mambayari supir."

"Mun supir taksi bila sampai waktu makan, inya singgah," jar ading ipar nang manyupir.

"Hahaha ... ayu Ding," jar Undas sambil mancangangi bininya ka balakang, lalu malihati jam, lalu sambungnya, "pahamai kalu leh, ni jam sapuluh liwat dah, mulai subuh tadi, jangan kan nasi, untuk gin kada disurungi urang."

"Hahaha ... sudah tiga bigi untuk diuntal masih ai terasa lapar lih," jar supir mamban buhan adingnya nang kada batawaran makan untuk bainti.

Sampai di Angsana hanyar tatamu warung makan nang sudah buku. Mutur singgah, lalu asing-asingnya mamasan makanan. Imbah makanan kaluar, asing-asingnya makan, kadada lagi nang bapandir.

GULU

Panitia kurban kamarian tu rami takumpulan di langgar mamandirakan urusan manyumbalih sapi awan kambing. Pas wayah mamandir wadah manyumbalih, pandir buhannya mulai bakakancangan. Ada nang manyaranakan manyumbalih di higa langgar, ada nang manyaranakan di lapangan. Tabarungan jarak lapangan awan langgar kurang labih saratus meteran haja.

“Sakali-sakali kita manyumbalih di lapangan pang,” jar Udin mausulakan wadah basumbalihan.

“Napang baalih-alih pada sini, ada nang managur ah,” jar Amir batakun awan Udin.

“Kada kaya itu pang Mir ai. Tabarungan di lapangan rumputnya pina sabat, palaran gasan makanan sapi awan kambing sabalum hari panyumbalihan,” jar Udin baalasan nang manguatakan usulnya.

“Mangangalihi,” jar Amir, lalu sambungnya, “mun sudah nyaman, nangapa mancari nang ngalih.”

“Nah am ... tasalah am ... maksudku Mir ai, kita ni cagar manyumbalih sapi anam ikung, kambing dua ikung. Biasanya sahari sebelum disumbalih, sapi awan kambing tu sudah diatar ka wadah kita kalu? Nah ... mun diandak di higa langgar, makanannya harus diangkut ka sini, awan lagi munnya bahira, kada nyaman dilihat parak langgar,” jar Udin manjalasakan.

“Bah ... mun kaya itu urusannya gampang,” jar Amir, lalu disambungnya, “sebelum disumbalih, sapi awan kambing tu andak di lapangan, wayah handak disumbalih hanyar dibawa ka langgar, iya kalu Ndas?” jar Amir sambil minta pendapat Undas.

“Hahaha ... ini urusan manyumbalih gasan kurban kalu?” sahut Undas sambil balas batakun.

“Hi ih,” jar Amir awan Udin manyahuti taimbai.

“Kaya ini na lah ... saingatku ...,” jar Undas pina musti bapandir, Udin awan Amir pina tamam muha mandangarakan, lalu Undas manarusakan pandirannya, “urusan basumbalihan ni mulai padatuan ...,” tasatup Undas bapandir karna Udin bakakajutan manyahut.

“Kita di sini Ndas ai urang hanyar barataan, kampungnya kampung hanyar, kadada nang bagana di sini mulai padatuan Ndas ai,” jar Udin sambil takarinyum marasa manang bapandir.

“Itu am Din ai, balum lagi urang tuntung bapandir ... sudah disahut. Jakanya sasahutannya pas ... kada papa, ini sahutannya kada pas, kita ni mamandir urusan manyumbalih kurban, kada mamandir batutuhaan bagana di kampung,” jar Undas, lalu sambil mancangangi Udin, “paham lah Din,” sambung Undas. Udin nang marasa disambat Undas batunduk sambil unggut-unggut marasa supan.

“Sampai mana tadi aku bapandir Mir?” jar Undas batakun awan Amir.

“Padatuan,” jar Amir. Tadarau buhannya mananawa akan, Amir nang marasa takutan kalu ada nang salah sahut, lalu mambujurakan, “urusan basumbalihan mulai padatuan.”

“Naaa ... itu ... rasanya mulai padatuan, bila urusan manyumbalih sapi atawa kambing gasan bakurban ... musti di gulu ... kadada nang manyumbalih di lapangan atawa di higa langgar,” jar Undas sambil karinyum-karinyum.